巨鴨回歸睇今日個天 冲好涼 或延明天

【明報專訊】黃色巨鴨Rubber Duck上周「唔duck」，放氣變成鴨餅，令一眾鴨迷好失望，但經過一周休養，巨鴨做好體檢，證實已無恙，綁住佢嘅纜索亦都修理好，巨鴨已準備就緒，好想快啲游返尖沙嘴海旁。主辦單位話，如果天公作美，巨鴨最快今天會同大家見面，否則可能會延至聽日。Emily即刻睇天文台預測，話今明兩日都有驟雨同狂風雷暴呀。

Emily噚日上網，又見到唔少網民將充晒氣嘅巨鴨喺青衣曬太陽嘅相片，上載到facebook同討論區，巨鴨狀態睇嚟唔錯，工作人員忙於用清潔工具幫佢冲涼，希望巨鴨以最佳狀態見人。

纜索冲斷 身體無損

邀請巨鴨來港嘅海港城，其發言人就話巨鴨身體無受損，由尖沙嘴運返青衣船塢唔係維修，而係方便將巨鴨裝嵌返上巨型浮台上面。發言人話，上周發現綁住巨鴨浮台嘅纜索因為大風浪冲斷咗，所以巨鴨先要唞一唞，而佢家做好檢查，好想盡快游返尖沙嘴，但要睇天氣，今日唔得就要等聽日，所以好難預先同fans講佢會邊刻返維港。

暫無計劃延長留港

雖然巨鴨唞咗好耐，但主辦單位話巨鴨會如期逗留至6月9日，暫未有計劃延長展期。